ನಾನೂ(ನು) ಅಮ್ಮ-ಅರ್ಥವಾಗದ ಜೀವಕ್ಕೆ

ನೀ ಧರೆಗಿಳಿದ ಕ್ಷಣ
ಇರದಾಯಿತು ತಲ್ಲಣ
ಪ್ರೀತಿ ಮನದಲ್ಲಿ ತುಂಬಿತು...
ಸಂತಸ ಇಮ್ಮಡಿಯಾಯಿತು

ಆ ಸಮಯ ಬಂದಿತು

 ಇನ್ನೊಬ್ಬರ ತೆಕ್ಕೆ ನೀನು
ಸಿಗಲಾರದಾದೆವು ದಿನಪೂರ್ತಿ
ಬರಿದಾಗದು ಜೋಳಿಗೆ ತುಂಬಿದ ಪ್ರೀತಿ

ಕಾಳಜಿ ಇದೆ
ನಿನ್ನ ಜೊತೆಯಾಡುವ ಬಯಕೆ ಇದೆ
ತೊದಲು ನುಡಿಯ ಪ್ರತ್ಯುತ್ತರ ಕೇಳುವ ಆಸೆ ಇದೆ
ನಿನ್ನ ನನ್ನ ಎದೆಯಲಿ ಹುದುಗಿಸಿ
ಪ್ರೀತಿಗರೆಯುವ ಹೆಬ್ಬಯಕೆ ಇದೆ
ನಿನ್ನ ತಪ್ಪು ಸರಿಯ ಗುರುತಿಸುವ
ತಿದ್ದುವ ತವಕ ತಾಳ್ಮೆಯಿದೆ
ನಿನ್ನ ಪ್ರತಿ ಹೆಜ್ಜೆಯ ತಾಳೆ ನೋಡುವ ಕಾತುರತೆ ಇದೆ
ನನ್ನ ತಾಯ್ತನ ಜೀವಂತವಾಗೇ ಇದೆ
ನಿನ್ನೊಟ್ಟಿಗಿರುವ ಸಮಯ ಕಡಿಮೆಯನಿಸುತ್ತದೆ
ಆದರೆ ಆ ಸಮಯ ಪೂರ್ತಿ ನನ್ನದೆ
ನೀನು ನನ್ನ ಮಗಳೇ
ನಾನು ನಿನ್ನ ಅಮ್ಮನೇ
ನಾನು ಅಮ್ಮನೇ