ಸಂಭಾಷಣೆ

ದಿನ ಉರುಳುತಿದೆ
ಒದ್ದ ಕಾಲ್ಚೆಂಡಿನಂತೆ
ತುಂಬುವ ಬಾರೊ ...
ಸವಿ ನೆನಪುಗಳ ಜೋಲಿ

ಮೂರು ದಿನಗಳ ಬದುಕಂತೆ
ಖುಷಿ ಕ್ಷಣಗಳಿಗೇಕೆ ಬರಗಾಲ
ನನ್ನ ಕನಸು
ಜೋಲಿಯಲ್ಲಿರಬೇಕು
ಬರೀ ಸಾರ್ಥಕತೆಯ ಭಿತ್ತಿ ಪತ್ರಗಳು

ಓದುವ ಹವ್ಯಾಸ
ಬಿಡುವಲ್ಲಿ ಬಿಡದೆ ನಗಿಸಬೇಕು
ಖುಷಿ ಪಡಿಸಬೇಕು
ಓದಿದ ಎಲ್ಲ ಲಕೋಟೆಯ
ನೆನಪುಗಳು

ಮಿತಿ ಇಲ್ಲದ ತಿರುಗಾಟ
ಊರ ಮೂಲೆ ಮೂಲೆಯಲ್ಲಿ ತೆಗೆದ
ನನ್ನ ನಿನ್ನ ಚಿತ್ರಪಟಲ
ನಗೆಭರಿತ ಮಾತುಗಳು
ಕುಚು ಕುಚು ಮಾಡಿದ
ಸಂದೇಶಗಳು

ರಮಿಸಿ ಪ್ರೀತಿಮಾಡೋಣ
ಹಗೆ ಸೇಡಿಗೆ ತಡೆ ಹಿಡಿಯೋಣ
ಸಮ ಬೆಸ ಆಟ ನಿಲ್ಲಿಸಿ
ಜೀವನದ ರಸ ಸವಿಯೋಣ

ನಮಗಾಗೆ ಬರೆದಂತಿವೆ
ಸಿನಿಮಾ ಹಾಡುಗಳು
ನನ್ನ ಧ್ವನಿಗೆ ನೀನೇ ಕೊರಳು
ನಿನ್ನ ಕನಸಿಗೆ ನಾನಾಗುವೆ ರುಜು
ನಾವಿಬ್ಬರು ನಡೆಯುವ ಹೆಜ್ಜೆಗೆ
ಗೆಜ್ಜೆ ಕಟ್ಟುವ ಸಂಭ್ರಮ
ಸವಿ ಜೇನು ತಯಾರಿಯಲ್ಲಿವೆ
ಹೂವು ಭ್ರಮರ